Le livre Jude en Nawdm
Voici le livre Jude en Nawdm
1 Man nnii Yuuda, Yeesu Krista ŋmɛɛɦeeda, Yakooba teela. Mà ɦoora ka seeŋa biiba Sa Saŋgband nn hoɦ n ka sɔkla ka kpɛɦdr Yeesu Krista man bee.
3 Mà tuurnhɔmba-n, mà da lo mà jugun na mà ɦɔr-n wadga l` hɛl jugu daɦb má n nn tn ba n bii. Gwɛntaɦ, mà ɦiluu n yum l` ba daɦt na mà ɦɔr-n wadgee na l´ si-n ŋmeenm na n` tam gwɛɛt ɦɛn tiim nn soɦdg Saŋgband man mii hoodr. D` sira welee gwɛɛt ɦɛn tiimii biiba bà tia Gohɔmt ɦɛn bee myenm ligaɦ'.
4 Biilm, nidbɛɦba jib n` huuga n ka kpaɦ n valgm miim n Saŋgband felaɦ', ka haam hɔmgu gwɛɛt Saŋgband nn sir-t tii na t´ magr n bà neerbɛɦm. Wadbuudga hɛɦdg weem n bɔɦɔɔ bá ret na tobr darm hɔda-ba. Bà ta kir Yeesu Krista l` ba na wii nnii t` Berm ɦayen. Biilm, t` jugu tii nnii.
5 N` miil hɔm man bɔɦɔɔ-n tii. Deedg-n lan nnii Saberma nn da daɦr ɦà tigr jugu Ĥejift tantn myenm lee! Kaann, ¿ɦà da ba ɦe bá ni biiba bá da kpaa tia ɦá ɦɛn bee t kpiidra?
6 ¿N` ta hɔŋ saŋgbantumtba gwɛɛtn? Bá ni biiba da saa bà kaalaŋa n ka ba ɦe bà ŋmɛɛg̈b wo ln gbaama lee. Nyaan-n lan nnii Saŋgband nn mad-ba nyeet sargan ka hɔd yaagu yaam gobermr lea!
7 Ta welee nnii Sodoom n Gomoor kɔrni n nan kɔrni ɦí da nyɔɦr n ɦin ɦii tiiba nn da fodg yaruub n lag n ka ta go n biiba bà kpaɦ na nidban. Gwelŋa lee, l` daraa bà tobr boglam m` bee kakeɦnan miin. ¿L` kpaa bɔɦɔɔ-n liin?
8 Ln la ba welee lee, nidbɛɦbee gokaat diila hɛɦra-ba bà ta hawla bayen ka nima Saŋgband hidr ka su saŋgbambiimn tiiba. ¿Lag bee heɦl n nyɔkb?
9 L` ba na saŋgbantumtba berm Mikaɦeela mɔma da ba ɦe welee wú n Kunid bá wen da kpal taa l` baɦr n na wen ba ɦà heɦm n Mohiisa gbanu lee wen. Bá kpalɦee nii, ɦà da ba suudg kunida. Ĥá da beda-wu n jaɦ' na Saberma dar ɦà tobr!
9 L` ba na saŋgbantumtba berm Mikaɦeela mɔma da ba ɦe welee wú n Kunid bá wen da kpal taa l` baɦr n na wen ba ɦà heɦm n Mohiisa gbanu lee wen. Bá kpalɦee nii, ɦà da ba suudg kunida. Ĥá da beda-wu n jaɦ' na Saberma dar ɦà tobr!
10 Gwɛntaɦ, nidbɛɦbee lee, bee suul ban kpaa mi bii. Ban mi bii lee, bá miil-b yem wo kpam dɔm. Welee bɔraa-ba kpaalaa.
11 Kunyɔŋu nan luura bà ɦɛn, l` kɔtɔd na bà tag Kayiina nakpaŋa. Bà ta ɦera bɛɦgu na bà yuuŋ lig̈biir wo Balɦaam, lee, n boorm. Bá ta vid Saŋgband jugun Koora dela, l´ saa na bà kpiidr.
12 Bà wen bo na n´ n ban n` di Berma diit, l´ ka haam-n na bà jul ka nyi n dewt ka kpaɦ n jiwɦi, ka kuum n bayen. Bà tɔna wada ɦam nn toɦd saaga kpaɦ ɦà ni ɦee. Bà ta boo tiini ɦì kpaa roon l´ wen ba na ɦì roon lee wen ɦii. Welee tiinɦii kpiidr mreɦ', l` kɔtɔd na ɦì vogdr n ka ta kpaa roon.
13 Bà yadra bà nakakeet ŋmɛɛgt wo nyaam nn vida n ka yadra m` wanbɛɦt kolgbiir jugun lee. Bà yɔɦwa yem wo toor nn wiida myenm n kuum lee. L` ɦera-ba welee na bá nan bɛm nyeet t` bee kakeɦnan tiin!
14 Gwɛɛt yandaa Henooka nn da bed n dool tii hɛla welee nidbee. L` lɔg Ĥadam kakeɦnan Henooka, l` ba wai hilbleɦ'. Ĥà da beda
na Berma ba ɦà daan wú n ɦà tumtbuudba ruuni ruuni
15 ɦà yaa baawenwu n yaagu. Ĥà kee ɦà dar fubɛɦtiibee mɛmbee tobr, ka tulg-ba hoogu l` baɦr n bà ŋmɛɛbɛɦt ban ɦer tii n suut ban suur-wu tii.
16 Welee nidbee nyeera Saŋgband gwɛɛt. Bà bɛlaa bà niɦi hɛruɦ ka kuum bayen n bii b´ kena bá neermn bii. Bà ɦɛna bà diila nn hɛɦr-ba na bà ɦɛm bii ka gwɛɛla ka weraa bayen ka jaɦra nidba ban ba bá bee bà way n bii bee.
16 Welee nidbee nyeera Saŋgband gwɛɛt. Bà bɛlaa bà niɦi hɛruɦ ka kuum bayen n bii b´ kena bá neermn bii. Bà ɦɛna bà diila nn hɛɦr-ba na bà ɦɛm bii ka gwɛɛla ka weraa bayen ka jaɦra nidba ban ba bá bee bà way n bii bee.
17 Mà teelhɔmba-n, deer-n gwɛɛt Berm Yeesu Krista tumtba nn da bed-n weem tii!
18 Bà da beda na gokaawran, nidba kee bà laɦm-n l` baɦr n na bá diilbɛɦa hɛɦra-ba vɔku n Saŋgband.
19 Welee nidbee nnii bá lɔɔ raarb Krista tiiba huuga bee. Bà neera ka tagd bà diila nn hɛɦr-ba na bá ɦɛm bii ka kpaɦ n Saŋgband Voɦoom.
20 Gwɛntaɦ, teelhɔmba nen lee, ked-n n nɔngan ka mɔɦ n` neerm n` gwɛɛt ɦɛn tiim jugun na m` rɛn Saŋgband mɔmr man! Seeŋ̈m-n ka tagaa n Voɦoom Buudm gemmntn!
21 Saŋgband sɔkla-n. Kpat-n n` neer sɔklbiin ka hɔd na t` Berm Yeesu Krista nan si-n neerm m` bee kakeɦnan mii ka tagaa n ɦà ɦigm nyaanb!
22 Yum-n bá gwɛɛt ɦɛn tiim lig̈wa bee ɦigm!
23 Bá bo na bà lɔɔ boglamn bee, tɔrgm-n-ba ka rea ka daɦ bá juuni! Volbee lee, ta yum-n bá ɦigm gwɛntaɦ ka ta sol-ba! Lagiim-n n bà dimtii mɛɦ ka kpaa tadaa n tn na bà hawlg-t n bà neerbɛɦm!
24 Saŋgband heɦl n nyɔkb. D` ba n gemmnt na d` mad-t na t` daa famtg. Dn la ba d´ jeegun lee, d` ba d` bee d` ɦe na t` jeɦnt d` nɔngan ka ba nyaag̈bn ɦii kpaa yu tiit na ɦà biir t` jugun.
25 Dii dyend n jaɦ beeln. Dii daɦl t` juuni ka tagaa n t` Berm Yeesu Krista. Dii heɦl n nyɔkb, n huraant, n gemmnt, n bermt tant ban koolg, n gwelŋa n nan bina mɛna kakeɦnan. L´ bɛm welee!
.jpg)
Post a Comment