La Bible en Kabyè , 3 Jean (iii Yohanɛɛsɩ)
1
Sɛtʋ
Weyi ma mɛnkɛ Krɩstʋ ŋgbɛyɛ taa sɔsɔ yɔ, mamaɣnɩ mɛ-ɛgbaɣdʋ Gayuusi weyi ña mɔnsɔɔlɩ toovenim taa yɔ takayaɣ kanɛ, mɛnsɛ-ŋ.
2 Mɛ-ɛgbaɣdʋ! Mɛwɛɛ mentendiɣ Ɛsɔ ñɔ-yɔɔ se eyele nɛ ŋwɛɛ alaafɩya nɛ piɖeni-ŋ pɩtɩŋa pɩ-taa ɛzɩ piɖeuni-ŋ Ɛsɔ nʋmɔʋ taa yɔ.
Gayuusi tɩŋɩɣ toovenim nʋmɔʋ
3 Man-taa hʋlʋmaa pɩtɩɩfɛyɩ, mbʋ́ pʋyɔɔ yɔ, taabalaa nabɛyɛ kɔm palɩzɩ ña-aseɣɖe se ŋɖɔŋ toovenim nʋmɔʋ taa siŋŋ ɛzɩ ŋtɩɩɖɔŋʋʋ yɔ.
4 Yee manɩwa se men-piya ɖɔŋ toovenim nʋmɔʋ taa yɔ, man-taa hʋlʋmʋʋ pɩtɩɩfɛyɩ. Nabʋyʋ fɛyɩ se pɩkɛdɩɣnɩ-m nɛ pɩkɩlɩ ḿbʋ́.
5 Mɛ-ɛgbaɣdʋ! Ŋlakɩ taabalaa mbʋ́ ŋɖʋwa se ŋlakɩ-wɛ yɔ, halɩ pɩkpɛndɩnɩ agɔmaa.
6 Palɩzɩ aseɣɖe ɛzɩma mbʋ́ ŋsɔɔlɩ-wɛ yɔ pʋ-yɔɔ Krɩstʋ ŋgbɛyɛ taa ñɩma ɛsɩndaa. Yee ŋsɩnɩ-wɛ ɛzɩ pʋmʋnaʋ Ɛsɔ ɛsɩndaa yɔ nɛ papɩzɩ pɔɖɔ pa-nʋmɔʋ yɔ, pʋwɛɣ ɖeu.
7 Pɔɖɔŋ nʋmɔʋ se pala Yesu Krɩstʋ tʋmɩyɛ. Pʋ-yɔɔ petetisi nɛ pamʋ mbá paañaŋ Ɛsɔ yɔ pe-nesi taa pʋyʋ.
8 Pʋ-yɔɔ lɛ, pʋwɛɛ se ɖa Krɩstʋ ñɩma ɖɩsɩnɩ pɩtɛ ɛyáa ḿbá nɛ pɩla se ɖa nɛ wɛ ɖisusuuni toovenim tɔm.
Ñɛ-ŋgbɛyɛ taa tɩlasɩ tɔm
9 Mama tɔm pee naayɛ Krɩstʋ ŋgbɛyɛ nɖɩ́ ɖɩ-taa ŋwɛɛ yɔ ɖɩ-taa ñɩma. Ɛlɛ́, Diyootrɛɛfʋ weyi e-liu wɛɛ se ɛkɛ pa-ñʋʋdʋ yɔ, ɛtakpaɣ-yɛ nɛ ɛ́yáa pʋyʋ.
10 Ḿbʋ́ yebina nɛ alɩwaatʋ ndʋ́ mɔnkɔŋ yɔ, meheyiɣ-mɩ mbʋ́ pɩtɩŋa payɩ ɛlakɩ nɛ pɩfɛyɩ ɖeu yɔ, nɛ tɔm ndʋ́ tɩtɩŋa payɩ ɛcɛtɩɣnɩ ɖa-taa yɔ. Pɩtɛkɛ pi-ɖeke ɛlaba. Ɛɛmʋʋ taabalaa, halɩ ɛɖaŋɩɣ lɛlaa mbá paba liu wɛɛ se pamʋ-wɛ yɔ. Mbá pamʋʋ-wɛ yɔ, ɛɖɔɔnʋʋ-wɛ ŋgbɛyɛ taa.
11 Mɛ-ɛgbaɣdʋ! Taatɩŋ lɛlaa ɛzaɣ́tʋ nʋmɔʋ taa, ɛlɛ́, tɩŋ-wɛ mbʋ́ pʋwɛ ɖeu yɔ pʋ-nʋmɔʋ taa. Weyi ɛlakɩ mbʋ́ pʋwɛ ɖeu yɔ, ɛkɛ Ɛsɔ pɩɣa. Weyi ɛ́lɛ́ ñalakɩ ɛzaɣ́tʋ yɔ, ɛtasɩ Ɛsɔ.
12 Piyele Demetriyuusi lɛ, ɛyáa tɩŋa lɩzɩɣ ɛ-yɔɔ aseɣɖe kɩbanɖɛ, halɩ toovenim tɔm maɣmaɣ lɩzɩɣ-ɖɩ ɖɔɖɔ. Đa ɖɔɖɔ, ɖɩlɩzɩɣ ɛ-aseɣɖe nɛ ŋna ɖɔɖɔ se ɖa-aseɣɖe ńɖɩ́, ɖɩkɛ toovenim.
Sɛtʋ
13 Mɛwɛnɩ tɔm sakɩyɛ se meheyiɣ-ŋ, ɛlɛ́, maacaɣ se mama-tʋ takayaɣ taa.
14 Mantaɣ liu se ɖɩkatɩɣ ɖama kɩyakɩŋ ɩnɛ ɩ-taa nɛ ɖɩyɔɔdɩ.
15 Wɛɛ laŋhɛzɩyɛ taa!
Ñɛ-ɛgbaɣdɩnaa se mɛnsɛ-ŋ. Sɛɛ ɖɛ-ɛgbaɣdɩnaa, sɛɛ pa-taa paa anɩ se ɖɩsɛ-ɩ.
Post a Comment